കച്ചവടക്കാർ അറിയേണ്ടത്
•┈┈•✿ مقالات ✿•┈┈•
📝കച്ചവടക്കാർ അറിയേണ്ടത്
ഇസ്‌ലാമിക മതവിധികൾ അറിയാത്ത കച്ചവടക്കാരെ ഉമർ رضي الله عنه മാർക്കറ്റിൽ നിന്നും വിലക്കാറുണ്ടായിരുന്നു.അദ്ദേഹം പറഞ്ഞിരുന്നു:
لاْ يَبِعْ فِيْ سُوْقِنَا إِلاْ مَنْ قَدْ تَفَقَّهَ فِيْ الدِّيْنِ
“ദീനിൽ അറിവ് നേടിയവരല്ലാതെ നമ്മുടെ മാർകറ്റിൽ കച്ചവടം നടത്തരുത്.”(തിർമിദി - 487)
പല രൂപത്തിലും ഭാവത്തിലുമുള്ള പലിശയിടപാടുകളും നിഷിദ്ധമായ സാമ്പത്തിക ക്രയവിക്രയങ്ങളും ബിസിനസ് മേഖലയിൽ വ്യാപകമാണ്. ശരിയായ അറിവും അവബോധവുമില്ലായെങ്കിൽ ഗുരുതരമായ അപകടങ്ങളിൽ ചെന്ന് വീഴും.
അലിയ്യ് ബ്നു അബീ ത്വാലിബ് رضي الله عنه പറയുന്നത് ശ്രദ്ധിക്കുക:
مَنِ اتَّجَرَ قبلَ أَنْ يَتَفَقَّهَ ارْتَطَمَ فِيْ الرِّبَا، ثُمَّ ارْتَطَمَ، ثُمَّ ارْتَطَمَ
“അറിവ് നേടാതെ കച്ചവടം നടത്തിയവർ ആവർത്തിച്ചാവർത്തിച്ച് പലിശയുടെ കുടുക്കിൽ ചെന്ന് വീഴും.”(മുഗ്‌നിൽ മുഹ്താജ് - 2/22)
ഇബാദത്തുകളിലെന്നത് പോലെ മറ്റുള്ളവരുമായുള്ള സാമ്പത്തിക ഇടപാടുകളിലും വിലക്കപ്പെട്ട കാര്യങ്ങൾ സംഭവിക്കാതിരിക്കാൻ അതുമായി ബന്ധപ്പെട്ട മതവിധികൾ നാം അറിഞ്ഞേ മതിയാകൂ. നബി ﷺ പറഞ്ഞു:
طَلَبُ العِلْمِ فَرِيْضَةٌ عَلَىْ كُلِّ مُسْلِمٍ
“അറിവ് നേടൽ ഓരോ മുസ്‌ലിമിനും നിർബന്ധമാണ്.”(ഇബ്നു മാജ - 224)
ഓരോരുത്തരും എത്രത്തോളമാണ് നിർബന്ധമായും പഠിക്കേണ്ടത്?
ഇബ്നുൽ മുബാറക് رحمه الله യോട് ചോദിക്കപ്പെട്ടു:
ما الذي يسعُ المؤمنَ من تعليمِ العلمِ إلا أن يطلبَه؟ وما الذي يجبُ عليه أن يتعلَّمَه؟
“ഒരു മുഅ്മിൻ പഠിക്കുകയല്ലാതെ നിവൃത്തിയില്ലാത്ത കാര്യങ്ങൾ എന്തൊക്കെയാണ്?എന്തെല്ലാമാണവൻ നിർബന്ധമായും അറിഞ്ഞിരിക്കേണ്ടത്?”
അദ്ദേഹം പറഞ്ഞു:
لا يسعُه أن يُقدِمَ على شيءٍ إلا بعلمٍ، ولا يسعُه حتى يسألَ
“ഏതൊരു കാര്യത്തിനും അതിനെ കുറിച്ചുള്ള (മതപരമായ) അറിവ് നേടിയ ശേഷമല്ലാതെ മുതിരരുത്. അതിനെ കുറിച്ച് ചോദിച്ചറിഞ്ഞ ശേഷമല്ലാതെ ഒരു കാര്യത്തിനും മുന്നോട്ടിറങ്ങരുത്.”(ജാമിഉ ബയാനിൽ ഇൽമ് - 1/56)
ഇസ്‌ലാമിക വിശ്വാസവും നിർബന്ധമായ ഇബാദത്തുകളും ചിട്ടപ്പെടുത്താനാവശ്യമായ അറിവ് ഓരോ മുസ്‌ലിമും നിർബന്ധമായും പഠിച്ചിരിക്കേണ്ടതാണ്. അതിന് പുറമെ, കച്ചവടക്കാരും സാമ്പത്തിക ഇടപാടുകളിൽ ഏർപ്പെടുന്നവരും അതു സംബന്ധമായ മതവിധികൾ പഠിച്ച് മനസ്സിലാക്കുകയും അറിവുള്ളവരോട് ചോദിച്ചറിയുകയും വേണം.
അല്ലാഹു തൗഫീഖ് ചെയ്യട്ടെ.
•┈┈┈┈•✿❁✿•┈┈┈┈•